قصة رومنسيه حب عند المصعد قمة في الرووووووووووووعه!!!!!!!

من طرف ***_*shosho*_*** الأحد فبراير 22, 2009 6:17 pm

السلام عليكم

كيفكم؟؟

جبتلكم قصه رومنسيه ((حب عند المصعد))

اخليكم مع القصه

منقول للامانه
وابي ردودكم لتكملت الاجزاء
اخليكم مع القصه
*********************
(( حب عند المصعد))gh\"-

ملاحظه : البنات ما يتغطون من أعيال عمهم أو عيال خالهم بس يكونوا متحجبين.*********************
(( الجزء الأول))
<< الساعة الرابعة عصرا من يوم الأربعاء >>
بوخالد : شوفي أنا بوقف السياره في المواقف وبجيك.. طيب
( بو خالد((ابراهيم)) (( يملك شركه)) متزوج حرمتين الاولى نوره(ام خالد) وعيالهم : خالد, مها, تركي, ساره,
حرمته الثانيه : (منيرة) ام خلود وعندها بس بنت : خلود
خلود : طيب .. بس لا تتأخر ماباقي شي على موعد الزياره
( خلود 22 سنه( آخر سنه رياضيات))بو خالد : الله يهديك وين ماباقي شي؟ باقي ساعه .. يالله انزلي
نزلت خلود من السياره ودخلت المستشفى وقفت عند المصعد وكان واقف واحد طويل وسيم ابيض لابس ثوب وشماغ وفي ايده باقة ورد وصل المصعد مد الرجال ايده عشان تدخل خلود
خلود: لا لا مشكور انا انتظر ابوي
ركب الرجال اول ماسكر باب المصعد وصل بو خالد
بو خالد : الى الحين وانتي هنا؟
خلود : ايه المصعد ما جى
انتظر بو خالد هو وبنته ولما جاهم المصعد طلعوا عليه ودخلوا لغرفة ام خلود وكانت حصه( ام نايف) وعيالها( نايف ، حنان) موجودين ( وكانت الغرفه غرفه خاصه يعني ما شاء الله كبيره )
بو خالد ، خلود : السلام عليكم (( تغطت ام نايف وحنان ماتغطت تعتبره مثل ابوها))
الكل : وعليكم السلام
خلود وهي مبتسمه : القمر وش اخباره اليوم ؟؟ ( سلمت على امها)
ام خلود : الحمدلله على كل حال
بو خالد: وشخبارك يام خلود ان شاء الله احسن من اول؟
ام نايف: لا الحمدلله احسن ..شوف الوجه ينور
( حصه (( ام نايف)) اخت منيره ام خلود زوجها متقاعد (( عبدالله بو نايف)) عيالهم : نايف , حنان ,فيصل)
من اول ما دخلت خلود ونايف ماشال عيونه عنها
نايف: شخبارك خلود؟
(نايف 25 سنه ( مدرس فيزياء))خلود ومنزله راسها : الحمدلله انت شخبارك؟
حنان : ياسلام تسألين عنه وانا بنت خالتك وصديقتك ماتسألين عني؟؟
(حنان 22 سنه (آخر سنه رياضيات وهي صديقة خلود))
نايف : انتي كل يوم تشوفينها بالجامعه اما انا صار لي فتره ماشفتها
خلود تبي تغير الموضوع: ها يمى تغديتي؟
ام خلود : ايه الحمدلله
بو خالد : ماتشوفين شر يا ام خلود
ام خلود : الشر ما يجيك تسلم
بو خالد : يالله عن اذنكم انا بروح اخلص ا شغالي وبجي اخذك يا خلود
هزت خلود راسها لبوها..طلع بو خالد من الغرفه
ام نايف شالت الغطا عن وجهها : هاا خلود شخبار دراستك؟
خلود قاعده بجنب امها وماسكه ايدها : الحمدلله يا خالتي تمام
ام خلود : يمى خلود مايصير تقعدين لحالك في البيت روحي بيت خالتك ..
خلود : يمى كلها كم يوم وبتطلعين من المستشفى ما يحتاج اروح وبعدين اخواني ساره وتركي قاعدين معي في البيت .. وابوي يمر علينا ساعات واحيانا ينام بعد
حنان : حتى انا وصديقتي نزورها
خلود : يمى لا تشيلين هم
ام خلود تكلم ام نايف : الله يخليك يا حصه انتبهي لخلود بعد عيني
ام نايف مبتسمه : جعل عمرك طويل ومحد راح ينتبه لها الا انتي
خلود : يمى وش هالكلام لا تقولين كذا !! ترا ازعل
نايف مبتسم : كل شي ولا تزعل خلود انتبهي يا خالتي
ضحك الكل وقعدوا يسالفون ..وبعد خمس دقايق راحت حنان بعيد عنهم تفتش بالغرفه لحقتها خلود
خلود : ابد ما تخلين عادتك وش عندك وش تدورين؟
حنان :ابد ولا شي بس بشوف يمكن الناس اللي كانوا هنا نسوا شي ما شيات
خلود بهمس : حنانوه فااتك
حنان لفت وجهها على خلود : وشو؟
خلود : وانا داخله المستشفى شفت واحد يقط الطير من السما
حنان : قولي والله ؟ وين شفتيه؟
خلود : تحت عند المصعد بس ياهو وسيم ترا يناسبك ههههههههه
حنان : صدق ؟ تكفين قولي لي وينه بروح ا خطبه هههههههه
جاهم نايف : وش عندكم مخلينا وقاعدين تسولفون لحالكم؟
حنان تسوي معصبه : سوالف بنات مالك خص
نايف : والله انك قليلة ادب شوفي خلود ما شاء الله عليها محترمه وخجوله وهاديه .. خلود عطيها شوي من اللي عندك
(خلود خدودها صاروا حمر ..)
حنان : اقول خلود خلينا نقعد مع خالتي ونسولف معها في ناس خربوا جونا
قاموا عند ام خلود وقعدوا يسالفون...
********************
(( في بيت ام خالد))مها نازله من غرفتها ورايحه للصاله وكانت ام خالد قاعده مع ساره اللي توها جايه من بيت ابوها
مها : يمى
(مها 22سنه (آخر سنه قسم عربي) مغروره وشايفه حالها وتغير من خلود))
ام خالد : وش تبين ؟؟ وبعدين ليش ما تسلمين على اختك ؟؟
مها : اوووه.. بعدين انا اكبر منها المفروض هي تسلم .. المهم ما علينا بروح بيت عمي
ام خالد : وش عندك في بيت عمك؟
مها : بروح اقعد مع بنت عمي اشوي اشتقت لها ما شفتها من زمان
ساره : يا كذبك خلود تقول انكم دايم مع بعض في الجامعه
((ساره 18سنه ثانويه عامه وتحب خلود عكس اختها مها )
مها معصبه : شوفي اولا لا تطرين لي اسم هالمخلوقه خلودووه ثانيا انتي مالك دخل فاهمه ولا لأ؟
ام خالد : وجع اللي يوجعك لا تحترمين لا كبير ولا صغير ما تشوفيني قاعده قدامك؟ ولا ترفعين صوتك بعد؟
مها زعلانه : يمى اسفه بس هذي بنتك هي والخايسه خليدووه مالهم دخل فيني
ساره ( تغيظ مها) : ابي اعرف انتي ليش ما تحبين خلود ؟؟ لانها اشطر واذكى منك؟ ولا لأنها اجمل منك واعقل منك؟
مها : وع عليها الله ياخذها مفشلتني في الجامعه تصدقين يمى البنات اللي بالجامعه يقولون لي ما نصدق ان خلود اختك ولا كأن ابوها تاجر .. يمى ملابسها ووع تفشل هي مع بنت خالتها
ساره عصبت : شوفي عاد اذا ملابسها تفشل هذا لانها متواضعه ولا هي بمغروره مثلك
دخل تركي عليهم
تركي : السلام عليكم
((تركي 20 سنه( سنه ثاني ادارة اعمال))الجميع ما عدا مها : وعليكم السلام
ساره : زين انك جيت تكفى خذني لبيت خالتي ام خلود البيت هذا يخنق
قامت ساره والبست عباتها
تركي : وش السالفه وش فيكم هذيك (( يقصد مها )) ماده البوز وانتي تبين تنخنقين وش فيكم؟
ام خالد زهقانه : يبون يذبحوني هالبنات كل ما قعدوا مع بعض تخانقوا
ساره : بسم الله عليك يمى بس بنتك ترفع الضغط
مها معصبه : انتي اللي ترفعين الضغط والسكر
سار : الا انتي اللي .........
تركي وقف بينهم : هي هي هي بس بس وش فيكم اجيب لكم سكاكين تذبحون انفسكم وتفتكون؟؟ يالله ساره قومي نروح بيت ابوي اريح على الاقل والواحد يقدر يرتاح وينام
طلع تركي مع ساره
ام خالد معصبه : الله يا خذك من بنت تبين تنحشين كل اللي في البيت يالله قومي انقلعي روحي بيت عمك ولا تجين
قامت مها وطلعت فووق تلبس عباتها ونزلت تحت
مها : يمى خالد فووق ؟؟
الا خالد تو يدخل البيت
خالد 23سنه موظف (( في شركه ابوه))
خالد : لا مو فوق هذا انا
مها : ول مسرع ماجيت
خالد حب راس امه وقعد : وش تبين فيني وش عندك؟؟
مها تلخبطت : هااا مابي شي بس حبيت اشوف انت هنا ولا لأ... يالله مع السلامه
خالد : وين وين ؟
مها : خل امي تقولك
طلعت مها ولا عندها في اخوها
ام خالد : خلها تولي بتروح بيت عمك اذتنا الله ياخذ ابليسها
خالد : ول ول وش فيها مهيووه.. بعد ساره مو هنا ولا كان قلنا متهاوشين
ام خالد : الا ساره كانت هنا وتهاوشوا وراحت بيت ابوك حتى ما شبعت منها
خالد : يمى الى متى تركي وساره يقعدون هناك ليش ماتجي خلود هنا احسن واخف؟
ام خالد : كان تصير جريمة قتل ؟؟
خالد : ههههههههههههه الله يهديها مها ما خلت احد بحاله... يالله يمى عن اذنك بروح انام
******************
( الساعه خمس انتهت الزياره طلعت ام نايف ونايف وراهم خلود وحنان وهم طالعين شافوا بو خالد واقف مع رجال)
خلود تدق حنان بكوعها : حنان هذا هو.. هذا هو
حنان وقفت عن المشي : زين شوي شوي ذبحتيني ..وينه ؟وبعدين من هو؟
خلود متلخبطه : هناك شوفيه مع ابوي ..شوفيه .. هذا راعي المصعد
تلفتت حنان وشافته : ايه شفته ايه والله صدقتي يطيح الطير من السما .. ولا طلع يعرف ابوك يا بختك
خلود : تتوقعين يشتغل عنده بالشركه ؟؟
حنان : والله جايز لان شكله 24 او 26 سنه بعدين انتي وش عندك تسألين عنه؟؟
خلود : اشششششش هذا ابوي جا
حنان : يالله اجل مع السلامه بروح الحق على امي واخوي
خلود : مع السلامه
بو خالد : هاا شبعتي من امك ؟
خلود : ايه يبى الحمدلله
بو خالد : اجل يالله مشينا
(( خلود ودها تستفسر عن هالرجال بس شلوون؟؟))
*********************
(( في بيت بو سعود))
بو سعود((حمد))((يملك شركه)) كان متزوج حرمتين الاولى هي نوره (( ام خالد حاليا)) وهي طليقته طبعا.. عندهم ولد واحد : سعود.. الحرمه الثانيه : ام تهاني (( متوفيه من 4 سنين)) وعندها بنتين: تهاني,نسرين
بو سعود كان في المطبخ يسوي له بيض دخلوا عليه بناته
تهاني : افااااا افااااا بو سعود يسوي بيض وانا راسي يشم الهوا
(تهاني 22 سنه.. آخر قسم رياضيات وهي صديقة خلود وحنان)راحت تهاني واخذت المقلى من ابوها وكملت .. قعد بو سعود على الكرسي عند طاولة الطعام وقعدت جنبه نسرين
بو سعود : اجل وين سعود؟
نسرين : يدخل سيارته .. الحين يجي
( نسرين 19 سنه .. قاعده في البيت )خلصت تهاني من البيض وحطته على الطاوله وجابت الخبز وقعدت دخل عليهم سعود من الباب الخلفي
سعود : يوووووه ريحة زفر وش مسوين ؟
(سعود 26سنه (يشتغل مع ابوه في الشركه ) ومتزوج عبير(25 سنه) بنت عمه وتوها جايبه بنت)تهاني : مسوين بيض لبوي ليش ما جبت له غدا من المطعم؟
سعود : وليش انتي ما سويتي له غدا؟
تهاني : انت عارف اني ماجيت من الجامعه الا العصر وبعدها رحت معك المستفى مايمديني اسوي قول لا ختك اللي قاعده في البيت
بو سعود : بس انتي وياه انا اشتيكت لكم؟
نسرين : يبى ليش ما تتزوج عشان ترتاح؟
تهاني : ليش يتزوج هذا احنا عنده ومو مقصرين وبعدين انتي قاعده في البيت لا شغله ولا مشغله
تضايق بو سعود وقام ولا كمل اكله
سعود بشويش : الله يقلع لسانك كذا سديتي نفس الوالد ؟ هذا هو قام ولا كل..
تهاني زعلانه : والله ما كان قصدي .. نسرينووه ليش تفتحين له موضوع الزواج هو اشتكى لك؟
طلعت تهاني لحقت ابوها تبي تعتذر منه
نسرين : مدري ليش تهاني ما تبي ابوي يعرس!!
سعود : والله انكم غريبات العاده الصغيره هي اللي ماتبي ابوها يعرس انتوا صاير عندكم العكس.. ما علينا.. وش رايك في بنوتي الحلوه؟
نسرين : ياربي تجنن قمر والله قمر طالعه علي
سعود : ايه بااين .. حبيبتي هي طالعه على ابوها وبعدين غصب تصير حلوه لان امها وابوها حلوين
نسرين : عدال لا يطيح نصك
سعود : ايه موتي من القهر .. المهم انا بروح اكلم حبيبتي عبوره احسن من اني اقابل وجهك
نسرين مبتسمه : ول عليك توك شايفها.. بعدين احمد ربك اني قعدت معاك
سعود وهو طالع من المطبخ وبصوت عالي : الحمدلله لك يارب
دخلت تهاني
تهاني : وش فيه اخوك ؟
شالت تهاني الصحن وراحت تغسله
نسرين : مبسوط ببنته الله يحفظها له.. ها اعتذرتي لبوي؟
تهاني مبتسمه : ايه والحمدلله رضى علي .. وسألني عن عبير وبنتها ويمكن الزياره الثانيه يروح لها وانا بروح معاه بتروحين ؟
نسرين : لا ماني رايحه كم مره اروح تونا جاين منها
تهاني : كيفك .. بصراحه ما شبعت من بنت اخوي
**********************
(( في بيت بو سلطان))
بو سلطان((سعد))(( شريك اخوه(حمد) بو سعود بالشركه)) وزوجته فاطمه (( ام سلطان)) وعيالهم :عبير, سلطان, اشجان) بو سلطان قاعد مع زوجته بالصاله
بو سلطان : اجل وين العيال من بعد الغداء ما شفتهم؟
ام سلطان تصب القهوه لبو سلطان : رايحين لا ختهم المستشفى
بو سلطان : شخبارها الحين بعد الولاده؟
ام سلطان : والله بخير .. الله يعينا على نفاسها وجمعت الحريم
بو سلطان : كم اخذت من ولدت 9 ايام؟
ام سلطان : لا تسع ايام اليوم يصير لها.... السابع
(( في هاللحظه دخلوا العيال))
العيال : السلام عليكم
سلموا على امهم وابوهم وقعدوا
ام سلطان وابو سلطان : وعليكم السلام
اشجان : يمى لو تشوفين رنوووودي تجنن يا دلبي عليها
((اشجان 20 سنه (ثاني سنه قسم دراسات اسلاميه))سلطان : ايه والله يمى تهبل تشبهني
سلطان 23 سنه( تو متخرج ولا لقى له وظيفه وتخصصه هندسة كمبيوتر )
ام سلطان : الله يحفظها ان شاء الله لامها وابوها
بو سلطان : وش رنوودي ؟؟ هذا اسمها؟؟
ام سلطان : لا اسمها صعب رماد مدري رمال
اشجان وسلطان : هههههههههههه
اشجان : يمى اسمها ريناد ري ناااا د
بو سلطان : وشو؟؟ ليش ما سموها فاطمه ولا حتى نوره على اسم ام سعود؟؟
سلطان : وش هالاسماء القديمه .. خلاص يبى هالاسماء تنفع للعصر الحجري
اشجان : الحين مافي الا ريناد ورهاد وريماس و....
ام سلطان : بس بس وش هالاسماء الصعبه
اشجان :هههههههههههههههه
بو سلطان : زين عبير شخبارها
اشجان : الحمدلله بخير تسلم عليكم
بو سلطان : الله يسلمك ويسلمها .. متى راح تطلع؟؟
سلطان : مدري هي تقول يوم الجمعه
اشجان قامت : يالله عن اذنكم بروح انام من جيت من الكليه وانا مانمت
سلطان : حتى انا بعد بروح عند الشباب
بو سلطان : وش شبابه روح دور لك على وظيفه
سلطان قام يعدل شماغه : وش وظيفته الحين العصر ما ينفع ادور يوم السبت الصباح ان شاء الله اني بدور
ام سلطان : انت لو ترضى وتشتغل مع ابوك في الشركه كان ارتحت
سلطان : الشركه ما أبيها كل العايله موجوده فيها بدور لي شي يختص بتخصصي
بو سلطان :اسمع اذا تقفلت عليك كل الابواب لعاد اشوفك عند باب الشركه فاهم؟
سلطان وهو طالع : فاهم وصدقني شركتكم مابيها
********************
(( في بيت بو ناصر))
بو ناصر((سلمان)) اخو ((بو خالد)).. مدير المدرسه اللي فيها نايف. وزوجته لطيفه (( ام ناصر)) وعيالهم: ناصر ,نهى ,ماجد, مي .
ام ناصر : يا ماري ماري ... مي يا مي
دخلت نهى على امها
نهى : وش فيك يا يمى تصارخين؟
(نهى 20 سنه( ثاني سنه عربي) صديقة مها بنت عمها ومن نفس طينتها)
ام ناصر : روحي افتحي الباب ما تسمعينه؟
نهى : الا يمى سمعته وكنت بفتحه بس سمعتك تنادين وجيتك ... هذي اكيد انها مها
قامت نهى وافتحت الباب لمها سلمت عليها ودخلتها داخل..سلمت مها على مرت عمها
ام ناصر : شخبارك ؟ وشلون امك وابوك؟
مها : بخير يا خالتي يسلمون عليك
نهى : يمى عن اذنك بنروح غرفتي نذاكر.. يالله مها قومي
ام ناصر : شلون تذاكرون ومها اكبر منك؟
نهى : هااا... ايه يمى بس تخصصنا واحد يعني عندنا مواد متشابهه .. يالله مها
طلعوا فوق ومروا على الصاله اللي فوق وكان فيها مي وماجد
مها : السلام عليكم عيال عمي
قام ماجد فاتح ايدينه يعني يبي يحضن مها( يبي يرفع ضغطها) : هلا وغلا هلا بالزين كله هلا بحبيبتي
ماجد 19 سنه( اول سنه محاسبه)مها : وخررر انت وجهك هذا اللي ناقص بزران يبون يحضنوني
ماجد مسوي زعلان : افاااا ليش تجرحيني يا بنت عمي انا احبك واموت فيك تكفين تزوجيني!!
مها : مجووود وووجع خل عنك هالخرابيط .. شخبارك مع المحاسبه؟
ماجد ( صار طبيعي ) : الحمدلله ماشي الحال
مها تطالع ناحية مي ورفعت صوتها شوي : زين.. مي وش فيها ماتبي تسلم علي ؟
قامت مي وسكرت كتابها بتروح لغرفتها ولما قربت عند مها : لاااا ماابي اسلم
(مي 18 سنه ثانويه عامه .. وصديقة ساره بنت عمها ومعاها بنفس الفصل)مها وهي معصبه : مالت عليك يعني انا اللي ابي اسلم عليك
نهى : ما عليك منها ولا تنسين علاقتها با ختك ساره .. يالله بس تعالي ابي ارويك المكياج اللي شريته..
ماجد : وانا اجي ابي اشوف معاكم ..
مها : ماجد خل عينك على كتابك زين بابا
وراحوا للغرفه وقعد ماجد على التلفزيون طلع ناصر من غرفته التفت عليه ماجد
ماجد : هلا يابو الشباب
ناصر مستعجل وطالع من الصاله : هلا فيك
(ناصر 24 سنه موظف في بنك)ماجد يكلم نفسه : وش فيهم هالناس راحوا وخلوني بروحي ... ما علي منهم خليني اتفرج على ام بي سي تو احسن لي
******************
يتبع

من طرف ***_*shosho*_*** الأحد فبراير 22, 2009 6:18 pm

(في بيت بو نايف )
بو نايف قاعد بالمجلس دخل عليه نايف
نايف : السلام عليكم يبى
بو نايف : وعليكم السلام
نايف : شخبارك ؟؟ وشلون المزرعه ؟
بو نايف : الحمدلله والمزرعه تو جاي منها وبصراحه يبي لها شغل
نايف : والله يا يبى من تقاعدت وانت بهالمزرعه وكل يوم يبي لها شغل .. الله يقويك ويعطيك الصحه والعافيه
بو نايف : الا فصيل اخوك وينه مااشوفه؟؟
( فيصل 20سنه ( سنه اولى حاسب الي المفروض سنه ثاني بس عادها)نايف : مدري عنه سألت امي تقول مع الشباب في الاستراحه
بو نايف : محد مدمره الا امك
نايف : يبى وش فيها اذا قعد الاستراحه مع الشباب عادي ما فيها شي
بو نايف : مافيها شي ؟؟ ايييه الشكوى لله
نايف : اقول خل عنك فيصل وقوم توضا الحين بيأذن المغرب
بو نايف قام : على قولتك الصلاه ابرك من فصيل
وقام نايف ورى ابوه
**********************
((في الصاله حنان تكلم خلود بالتلفون ..))
حنان : يعني يوم السبت ما علينا الا الواجب هذا
خلود : ايه وباقي المحاضرات دروس جديده
حنان : زين .. الا تعالي تهاني شخبارها من بعد الجامعه وانا ما دريت عنها العاده اول ما تجي البيت تدق!!
خلود : انا قبل العصر دقيت عليها وقالت انها بتروح تزور مرت اخوها توها والده..
حنان : اهااا.. طيب والحين كلمتيها.. ولا هي دقت عليك؟
خلود : لا.. اول ما جيت قعدت مع ساره وتركي
حنان : شخبارها ساره ان شاء الله بخير ؟
خلود : الحمدلله بس متهاوشه مع مها
حنان : هذي مها ما تخلي احد بحاله ابد لا في الجامعه ولا في البيت اشوى انك مو ساكنه عندهم ولا كان صارت علوم
خلود : يا بنت الحلال انا ماعلي منها اهم شي ابوي .. الا على طاري ابوي تصدقين انه ماتكلم عن الرجال اللي كان وياه بالمستشفى لما كنت معه بالسياره؟
حنان : وانتي وش دخلك بالموضوع عشان يتكلم معك فيه ؟؟
خلود انحرجت : هااا لا بس المفروض انه يسولف يقول لي وين راح ...من كلم .. يعني يسولف معي
حنان : لا والله لا يكون انتي امه ولا ابوه عشان يقولك .. ولا وش رايك اذا يبي يسوي شي يستأذن منك ؟
خلود : حناااان بلا بياخه انا ماكنت اقصد انا قصدي...
حنان : اشوفك مهتمه بهالرجال لا يكون بس اااا
خلود تغير الموضوع :هااا ..الا تعالي حنان انتي عرفتي حل هالمسأله بصراحه دوختني احس انها معقده
حنان : لا والله.. طيب يا خلود غيري الموضوع بس ماراح اخليك .. أي مسأله تقصدين؟
وكملوا سوالفهم
*************************
((بيت بو ناصر- غرفة نهى))
نهى : هااا مها جبتي اللي قلت لك عليه؟
مها : لا ماقدرت تو سألت عنه عند امي الا هو داخل علينا
نهى : يووووه حسااافه طيب متى راح تجيبينه ؟؟
مها : مدري والله انتي تدرين في الصباح هو في شغله وانا بالجامعه؟؟ انتي ليش مستعجله ان شاء الله بيجي يوم وهو عندي..
نهى : بصراحه انا خايفه يا مها وابي اتأكد من الموضوع عشان مااتوهق
مها : ليش خايفه ؟؟ انا قلت لك خليني اسأله؟
نهى : لا تكفين ماابيه يحس بشي .. انتي جيبي اللي قلت لك عليه انا عندي خطه جهنميه
مها : ما عليك .. تطمني راح اجيبه لك بس انتي لا تستعجلين ... يالله بس رويني وش شريتي ..
*************
طلعت مي من غرفتها شافت ماجد نايم على الكنبه نزلت تحت.. البيت فاضي ما في احد طلعت الحوش وقعدت شوي على الكراسي اللي برى.. طفشت قامت لبيت الشعر قعدت تدور لها شي.. مجله.. جريده تبي تسلي نفسها وهي تدور اسمعت صوت من برى راحت عند الدريشه وقعدت تطل شافت ناصر شايل كرتون كبير وفي الجهه الثانيه رجال يشيل معاه.. حطوا الكرتون بالارض
وقعدت تسمع ...
ناصر : مشكور يا محمد ما قصرت
محمد : العفو ولو احنا بالخدمه
ناصر : اتفضل .. اشرب لك شي
(( مي : يووووه لا يكون بيدخله هنا ؟؟ ))
محمد : معليش يا استاز ناصر دنا مشغول شويه
(( مي خايفه : اشوى))
ناصر : يابن الحلال اقعد اشوي الشغل لاحق عليه.. حالف عليك
محمد : طيب امرنا لله
وجى ناصر ومحمد صوب بيت الشعر
(( مي ميته من الخوف: ياااربي وش اسوي الحين بيدخل الرجال هنا وين اروح وين انخش .. يا ويلي من ناصر ياربي استر وش اسوي))
قرب ناصر ومحمد من الباب الا يرن جوال محمد
محمد : عن ازنك .. الوو ... .. ايوه ..ايوه .. اوكي دنا قاي دلوئتي.. مع السلامه ... معليش يا استاز ناصر خليها مره تانيه الشغل عاوزيني ضروري
ناصر : يالله مو مشكله مره ثانيه ان شاء الله
(( مي ارتاحت : اووووووف الحمدلله لك يارب))
راح ناصر ووصل محمد للباب وسكر الباب .. طلعت مي
مي : احم احم
ناصر مغزوع والتفت وراه : ووووجع خرعتيني ... وش عندك هنا؟؟
مي : كنت طفشانه وقعدت هنا شوي؟؟
ناصر معصب : لو اني مدخل الرجال هنا وش كنتي بتسوين ؟؟
مي خايفه : ناصر وش دراني انك جاي ومعاك واحد (( تبي تغير الموضوع)) الا اقول وش اللي بالكرتون هذا؟؟
ناصر يهاوش : مالك دخل يالله انقلعي روحي داخل وياويلك ان شفتك مره ثانيه هنا يالله
مي زعلانه : طيب
راحت مي بسرعه ودخلت داخل (( تكلم نفسها )) وش فيه هذا معصب ؟؟ واللي بالكرتون وشو؟ بروح اصحي ماجد عشان يشوف ويقول لي .. (( طلعت مي فوق وراحت عند ماجد))
مي : ماجد ... ماجد قوووووم
ماجد : اووووووه وخر عني وش تبين؟
مي : قووم نام داخل بغرفتك ؟
ماجد : ........
مي : مجوووود لا يكون ماصليت المغرب ؟؟ قوم .. يالله قوووم صل المغرب ولا بعلم عليك ابوي يالله قووم
ماجد : طيب طيب
قام ماجد وراح غرفته ... قعدت مي بالصاله تنتظر ماجد .. تأخر عليها
مي : وش فيه هذا تأخر ؟؟ بروح اشوفه لا يكون نايم بس؟
دخلت غرفة ماجد لقته نايم على السرير
مي بصوت مرتفع : ماااااااااااااااااااااجد قوووم صل
ماجد : روحي انقلعي صليت
مي : علي هالكلام.. اصبر هين اعرف انا الحين كيف اقومك
راحت مي عند ماجد الا شافت السجاده مفتوحه في الجهه الثاني .. قعدت على السرير
مي : احمد ربك ان السجاده انقذتك
ماجد : ميوووه اطلعي برا تراني مو فاضي لك
مي : قووم ناصر برى عنده كرتوون كبير مدري وشو ؟؟ قووم تكفى شووفه و قول لي؟
ماجد : خلاص اشووفه بعدين.. يالله اطلعي برا وطفي النور وسكري الباب وراك
مي عفست وجهها : زين
طلعت مي وسكرت الباب وراها الا تبي تعرف وش هالكرتون الكبير راحت عند الدريشه مالقت الكرتون عند الباب وشافت ناصر داخل طالع ... مي طفشت تبي تعرف بأي طريقه وش فيه هالكرتون؟؟
*********************
(( في بيت بو سعود))
بو سعود : يالله يا تهاني تأخرنا
تهاني نازله من الدرج : يالله هذا انا جيت
بو سعود : وسعود وينه ما هو برايح؟
تهاني : مدري والله لحظه ادق عليه
دقت تهاني على جوال سعود الا الجوال بالصاله
تهاني : جواله هنا .. اجل اكيد انه هنا
طلع سعود من دورة المياه وشاف تهاني وابوه بالصاله
سعود وهو ينزل اكمام ثوبه : هاا الحين بتروحون؟
بو سعود : ايه بتروح معنا ولا لحالك؟
سعود : لا روحوا انا فاتتني صلاة العشا جماعه بصليها هنا والحقكم
قام بوسعود : يالله خير ان شاء الله
طلع بو سعود وتهاني نزلت نسرين من فوق شافت سعود يصلي انتظرته لين خلص
نسرين : تقبل الله
سعود : منا ومنك صالح الاعمال
نسرين : منت رايح لعبير ؟
سعود : الا الحين بروح ؟ ليش تبين شي ؟
نسرين : ايه .. اذا ماعليك امر وانت جاي بليز جيب معاك عشا اوكي
سعود : وليش انتي ما تطبخين؟
نسرين : مالي خلق لا للمطبخ ولا للطبخ ... اه وينك يا عبير متى ترجعين البيت وتريحينا من هالطباخ!!
سعود : يا سلام يعني ما اشتقتي لعبير اشتقتي لطباخها؟؟
نسرين تبي تغيظ سعود : اممممم بصراحه انا اشتقت لها بس اشتقت لطباخها اكثر .. يعني انت عااارف ان عبير عليها ذاك الطبخ اللي ..
سعود رمى عليها علبة المناديل : اقوول بلا فلسفه زايده ولا تغلطين على حبيبتي
نسرين مبتسمه : ووش فيك زعلت انا ما قلت شي غلط ..هو صحيح ان...
سعود لبس شماغه وطلع : اقول قعدي هذري لحالك انا تأخرت على عبورتي
نسرين بصوت عالي عشان يسمعها سعود : يا بخت عبير لقت لها واحد يحبها كثرك
****************
دخلت خلود المستشفى ووقفت تنتظر المصعد وقاعده تتلفت يمين ويسار
خلود في نفسها : وينه ؟؟ ليتني اشوفه مره ثانيه ؟؟
وصل المصعد وطلعت عليه وصلت الدور اللي فيه امها وقعدت تدور الين ما وصلت غرفة امها
خلود في نفسها : شكله ما جى اليوم يالله ان شاء الله اشوفه بكره
دخلت خلود غرفة امها وسلمت عليها
خلود : شلونك يمى الحين عساك بخير
ام خلود : الحمد لله يا بنيتي ؟؟ اجل وين ابوك؟؟
خلود : انا ماجيت مع ابوي انا جايه مع تركي نزلني وراح
ام خلود : وشخبارك يا بنتي عساك بخير ومرتاحه؟
خلود ( والدموع مليانه بعيونها ) : مرتاحه يا يمى بس ناقصني وجودك معي في البيت ..
قعدت خلود تسولف مع امها ولا حست بالوقت الا بدخلت تركي عليهم
تركي : السلام عليكم ؟؟ شخبارك خالتي؟؟
راح باس راس خالته وقعد
ام خلود : بخير شلونك انت ؟؟ وش اخبار امك؟
تركي : الحمدلله بخير .. اهم شي انتي بشرينا عن صحتك؟
ام خلود تتنهد : ايييه الحمدلله على كل حال
تركي يكلم خلود : يالله خلود الزياره انتهت
قامت خلود وباست راس امها
خلود : يمى انتبهي لنفسك
ام خلود : انتي اللي انتبهي لنفسك ... تركي واللي يخليك انتبه لا ختك
تركي : لا تخافين خلود في عيونا
ام خلود : تسلم عيونك .. الله يخليك لهلك ويوفقك يارب
تركي : يالله خالتي ماتشوفين شر
خلود : مع السلامه يمى
انزلت خلود وتركي للدور الارضي ووصلوا عند البوابه
تركي : انتظريني هنا بروح اجيب السياره واجي طيب
خلود : طيب .. طيب
راح تركي وقعدت خلود بالكراسي اللي برى وقاعده تطالع يمين ويسار الا تجي عينها على الرجال اللي طلع من المستشفى دق قلب خلود بقوه وقالت بنفسها : اخيرا شفته مره ثانيه.. وفجأه تضايقت لانه مو لحاله معاه وحده !! اسألت نفسها : مين اللي معاه ؟؟ لا يكون زوجته بس؟؟ ولا شالت عينها الا لما راحوا بعيد .. وصل تركي وقامت خلود وركبت السياره... قعدت تفكر وتسأل نفسها؟؟ معقوله حبتيه يا خلود ؟ بس انتي ما تعرفينه و هوما يعرفك ولا درى عنك ويمكن هذي ثالث مره اللي تشوفينه فيها؟؟ طيب هذي زوجته؟؟ لا لا هذي يمكن اخته؟؟ طيب ليش موزوجته؟؟ ااااااه ياربي
تركي : هيييي خلود وين وصلتي؟
انتبهت خلود لتركي : هاااا .. معاك معاك .. بس ما سمعتك وش كنت تقول؟
تركي : والله منتي بيمي اللي ماخذ عقلك يتهنا به
خلود بنفسها : وين يتهنى به وهو مايدري عني
تركي : وش رايك نمر على ساره ونروح نتعشى بمطعم؟؟
خلود : على راحتك .. أنا ماعندي أي مانع
*************************
(( في بيت بو ناصر))نهى تسلم على مها عند باب الصاله
نهى : يالله مع السلامه حبيبتي واماااانه لا تنسين اللي اتفقنا عليه
مها : افاااا عليك اعتمدي علي الله ثم علي .. يالله مع السلامه
نهى : مع السلامه
كان بين باب الصاله والحوش 4 درجات.. قبل لا تنزل مها من الدرج طاحت شيلتها بالارض انزلت تاخذها ومارفعت راسها الا يصدم فيها ناصر لانه كان مسرع ولا شافها قدامه
مها معصبه : عمى اللي يعميك ماتشوووف؟؟
ناصر معتفس : آسف .. اعذريني والله ما شفتك ... لا يكون تعورتي بس
مها (( من طرف خشمها)) : لا ماتعورت بس وخر عن طريقي
وخر ناصر وقعد يراقبها لين ما طلعت من البيت
ناصر يكلم نفسه : ول عمى اللي يعميني مره وحده ؟؟ بس ما عليه مقبوله منك يا عسل
دخل ناصر الصاله وشاف نهى
ناصر : من متى ومها هنا؟
نهى مشغوله بالتلفزيون تغير من قناه لقناه : من العصر..
ناصر : وليش ماقلتي لي انها هنا؟
نهى التفتت عليه : وليش اقولك ان شاء الله؟؟
قعد ناصر جنب نهى : نهى حبيبتي .. مها تحبني مثل ماانا احبها ؟؟
نهى تطالع فيه با احتقار : عمرها ما فكرت فيك اصلا
ضاق صدر ناصر ليش مها ما تحبه وش ناقصه ؟؟ وليش هو يحبها ويموت فيها ليش متعلق فيها لهدرجه؟؟*********************
(( في بيت بو نايف -- الساعة 12 بالليل حنان تسولف مع خلود على التلفون ))
حنان : خلود وش فيك ؟ احس انك زهقانه ؟ هذا وتوك جايه من المطعم .. وش سالفتك ؟؟
خلود زهقانه : مدري وش فيني يا حنان احس ان ضايق صدري مدري ليه وما ني قادره انام
حنان : يوووووه طيب ليش كل هذا ؟؟ خالتي فيها شي؟
خلود : لا امي بخير ما فيها شي
حنان : اجل وش فيك ؟ وش اللي مكدر خاطرك لهدرجه؟
سمعت حنان صوت برى غرفتها
حنان : خلود .. لحظه اشوي كأني اسمع اصوات برى الغرفه
خلود : طيب
طلعت حنان من غرفتها شافت فيصل متكي على نايف ويمشي بصعوبه .. خافت حنان
حنان : نايف وش فيه فيصل ؟؟
نايف : اووووووش اسكتي لا تفضحينا وتصحى امي ولا ابوي
حنان بشويش : زين قولي وش صاير ؟؟
نايف : حنان واللي يرحم والديك ادخلي غرفتك بكره اقولك .. وفيصل ما فيه شي شوي تعبان
اسمعت حنان كلام اخوها ودخلت غرفتها واخذت سماعة التلفون
حنان : هلا خلود
خلود : هاا من وين طلعت هالاصوات؟
حنان : هذا نايف .. الهم ما علينا قولي لي وش فيك؟
خلود : اقولك شي بس ما تهاوشيني؟؟
حنان : قولي ما راح اهاوشك
خلود متردده : طلع متزوج يا حنان
حنان : من هو؟
خلود : راعي المصعد
حنان : تتكلمين جد؟
خلود : ايه والله اليوم شفته بالمستشفى ومعه زوجته
حنان : خلود .. أنا مااقولك من جد انه متزوج .. من جد انتي حبيتيه؟؟
خلود : ............
حنان : خلود ما دريت انك ****ه .. معقوله تحبين واحد ما شفتيه الا اليوم ولا تعرفينه ولا يعرفك؟
خلود : مدري يا حنان بصراحه من شفته وانا قاعده افكر فيه حاولت اطلعه من راسي ما قدرت
حنان : والله انك مو صاااحيه .. وبعدين هذا هو طلع متزوج وش لك فيه؟؟
خلود : لا لا شكلها مو زوجته ..
حنان : لا تخبليني توك تقولين زوجته والحين مو زوجته .. تكذبين على نفسك؟؟
خلود : مدري بس ما سيت انهم متزوجين شكلها اخته
حنان : طيب واذا طلعت اخته وش راح تستفيدين؟
خلود : على الاقل راح ارتاح انه مو متزوج
حنان : خلوود عن الخبال بس
خلود : وش فيك حنان .. هو يعرف ابوي يمكن يوم من الايام بوي يعزمه
حنان : واذا اعزمه بتروحين له بالمجلس ؟؟
خلود : هاااا ... مدري يا حنان وبعدين لا تخليني اندم لاني قلت لك
حنان : والله كيفك يا خلود انتي عقلك براسك ومنتي بغبيه فكر زين وصدقيني ماراح تسفيدين شي
خلود : .............
حنان تتثاوب : يالله طسي أنا بروح انام وانتي خلك مع راعي المصعد
خلود : هههههههه طيب بس ان شاء الله تجربين الحب وراح تعذريني بعدها
حنان : ايه خلاص .. يالله تصبحين على خير
خلود : وانتي من اهله واحلام سعيده
قفلت خلود السماعه واخذت الراديوا وقعدت تقلب الا سمعت مقطع حلو من اغنية ام كلثوم
(( طول عمري با ئول لا أنا أد الشوء وليالي الشوء ولا ئلبي أد عزابوا عزابوا ...... وا ئبلتك انت لئيتك بتغير كل حياتي ما اعرفش ازاي أنا حبيتك ما اعرفش ازاي يا حياتي من همسة حب لئيتني با احب .... آآآه لئيتني با احب وادوب في الحب .....
***************************************
اوكي حبايبي الحين الجزء الاول خلص انتظروني في الجزء الثاني بس شرط ابي ردودكم الحلوه
ماراح اطول عليكم

من طرف ***_*shosho*_*** الأحد فبراير 22, 2009 6:21 pm

(( الجزء الثاني))
(( غرفة خلود))

سارة تصحي خلود من النوم : خلود ... خلود قومي وش ها لنوم ... خلووود
خلود : كم الساعة الحين؟
سارة : الحين الساعة وحده الظهر
خلود : وشو الساعة وحده ؟؟ يوووه تأخرت وما صليت الظهر
سارة : اخاف الفجر بعد ما صلتيها؟
خلود : لا لا الحمد لله صليتها اصلا ما نمت الا بعد صلاة الفجر
سارة : زين يالله قومي أنا وتركي ننتظرك على الغدا
خلود : سارة آسفه لاني ما طبخت لكم اعذريني يا قلبي
سارة مبتسمه : ولا يهمك ... يالله عاد قومي لا تتأخرين
ابتسمت خلود لا ختها وقامت من فراشها و سارة طلعت من الغرفه وخلود راحت تغسل وتتوضأ
*******************
(( بيت بو سعود – غرفة سعود))
سعود يكلم عبير على الجوال
سعود : آآه يا عمري مشتاق لك
عبير : خلاص هانت بكره بطلع من المستشفى و...
سعود زعلان : وبتقعدين بيتكم شهر
عبير : طيب وش اسوي يا قلبي تدري هذا البكر يعني لازم نفاسي عند امي
سعود : لازم تقعدين شهر ؟؟
عبير : يا قلبي يا سعود هونها وتهون اوكي ؟
سعود يغني : احبك والقمر يشهد ونجم الليل يا عمري .. احبك تشهد الدمعه ..احبك تشهد جروحي .. غرامك صار عنواني وانا قبلك بلا عنوان ..آآآه احبك يا عمري
عبير بخجل : وانا بعد احبك موت
سعود : حبي يصير انام عندكم في البيت؟
عبير : هههههههه لا ما يصير و اشجان وين تروح ؟؟ بس يصير انك تزورني
سعود : لا والله ... اصلا غصب راح ازورك وبجيك اول ما اخلص الدوام ولا راح اطلع الا .... 2 بالليل يعني بصير لززززقه
عبير : هههههههه احلى لزززقه يا عمري
صوت طقطقه على باب غرفة سعود
سعود : لحظه يا عمري ..... مين؟
نسرين : انااااا
سعود : ادخلي يا نسرين
فتحت نسرين الباب : قوم تغدا...
سعود يكلم عبير : تصدقين يا عمري من بعدك غداي وعشاي من المطعم!!
نسرين ارفعت صوتها عشان عبير تسمع : كذاااب ما عليك منه كل يوم أنا اطبخ له انهد حيلي من الطبخ
سعود : أنا كذاب هين يا نسرينوه
عبير : ههههههههه خلاص عمري روح تغدا
سعود : طيب وبعد الغدا برجع ادق عليك اوكي حياتي ؟
نسرين بشويش : ول عليك .. ما تشبع منها ؟
عبير : اوكي يا قلبي ... مع السلامه
سعود : مع السلامه ... امووووووواه
سكر سعود الجوال ورفع راسه ويشوف نسرين تبتسم
سعود : للحين انتي هنا ؟
نسرين : يا اخي احترمني
سعود : وش تبين ؟
نسرين : ابيك تنزل تتغدا
سعود : لا يكون انتي اللي طابخه؟
نسرين : لا تهاني
سعود : اشوى
نسرين مسويه معصبه : بلا اشوى بلا هم خلصنا يالله قوم
سعود قاعد يدور اقرب شي عشان يرميه على نسرين ولما التفت ما شاف الا غبارها... نزلت نسرين للصاله تركض .. وكانت تهاني تجهز السفره
تهاني : هيييي عن الخبال وش فيك ؟
نسرين : سعود يبي يضربني
تهاني : اكيد رافعه ضغطه تستاهلين
بو سعود : تعالي عندي ولا راح يقدر يلمسك
راحت نسرين وقعدت عند ابوها
نسرين بقهر : ايه والله يحسب نفسه هو الوحيد اللي عنده مره ذبحنا عالطالعه والنازله عبير وعبير
تهاني : يمى منك قولي الله يهنيه مو تحسدينه
بو سعود : بكره بتعرسين وبتذبحينا بزوجك وكأن محد عنده رجل الا انتي ههههههههه
نسرين تمثل : يبى خلاص استحي
تهاني باستغراب : انتي تستحين ؟؟
نزل سعود وتهاني راحت تجيب الغدا
سعود : وينها هالملسونه؟
نسرين تخبت ورى ابوها
سعود : ايه انخشي ورى ابوي الوعد بعدين
بو سعود : حدك عاد الا نسريني لا تلمسها
نسرين تسوي حركات بو جهها لسعود ترفع ضغطه ..وسعود يتوعد فيها... جات تهاني وحطت الصحن وتجمعوا على السفره وتغدوا
*******************
(( في بيت بونايف – الصاله))
الكل قاعد بالصاله ام نايف وبو نايف قاعدين على الارض يتقهون .. فيصل منسدح على الكنبه .. ومقابله نايف قاعد على الكنبه يطالع قناة العربيه دخلت حنان الصاله وكتابها بأيدها وراحت وقعدت جنب نايف
حنان بشويش : ناايف
نايف ووجهه على التلفزيون : نعم
حنان بشويش : وش فيه فيصل البارح؟
التفت نايف لحنان وبصوت خفيف : وش فيك انتي تبين تفضحينا؟ قلت لك ما فيه شي؟
حنان : ما فيه شي ؟ طيب .. يمىىىى
نايف دقها بكوعه : خلاص بعدين اقولك
ام نايف : نعم يمى
حنان مبتسمه : الله لا يهينك صبي لي شاي
قعدت حنان تتقهوى مع امها وابوها .. وبعد دقايق قام نايف وطلع الحوش شافته حنان قامت ولحقته .. راح نايف ناحية الكراسي وقعد وحنان وراه
نايف : وش فيك لا حقتني ؟؟
قعدت حنان : ابد ما ابي شي بس ابي اسولف معاك
نايف : مصره الا تعرفين وش فيه فيصل؟
حنان مبتسمه : اذا سمحت
نايف : بس توعديني ما تقولين لاحد خاصة امي وابوي
حنان : اوعدك والله ما اقول لهم
نايف : يا طويلة العمر البارح الساعة 12جاني اتصال من جوال فيصل .. رديت الا هو خويه وليد ..
وليد : نايف.. تعال الاستراحه الفلانيه واخذ اخوك ..
نايف : وش فيه فيصل؟
وليد : مدري وش اقولك ..
نايف : قول اللي عندك خلصني
وليد : بصراحه اخوك كثر شرب اليوم وطاح علينا ومو عارفين وش نسوي فيه قلت ادق عليك وانت تتصرف
نايف : يا عيال ال**** توهقونه ويوم يطيح عليكم تتبرون منه
نايف يكمل السالفه لحنان : وقفلت الخط ورحت له الاستراحه الا هو منتهي والباقي انتي شفتيه
حنان منصدمه : معقوله فيصل يشرب ؟
نايف : أنا نفسك ماكنت مصدق فيصل تغير كثير مو مثل اول
حنان : صدقت حتى بدراسته كان دايم ياخذ ممتاز والحين عايد السنه
نايف : رفقاء السوء لهم دور
حنان : وانت الحين وش بتسوي ؟
نايف : مدري..رحت له الصباح وكلمته وللأسف كلامي مااعجبه وقال لي مالك دخل فيني وانا مو بزر ومن هالكلام
حنان : ليش ما تقول لبوي؟
نايف : وش بيسوي ابوي بيحبسه في البيت ؟ ما عليك أنا راح احاول معاه وان شاء الله ينصلح حاله
حنان : الله يسمع منك
نايف : ....... الا خلود شخبارها؟
حنان : الحمد لله بخير
نايف : اتهقين شعورها نا حيتي كيف؟
حنان : شلون يعني كيف؟
نايف : يعني تسولف عني ؟ تحسين انها مهتمه فيني ؟
حنان : عاادي تسأل عنك احيانا
نايف : حنان تكفين كلميها في موضوعي ..
حنان : أي موضوع؟
نايف :قولي لها الزواج بعد ما تتخرج أنا موافق بس على الاقل نكتب الكتاب
حنان : تبي تخطبها يعني ؟؟
نايف : ان شاء الله بس ابي اعرف شعورها ناحيتي بالاول
حنان : امممممم خلاص ان شاء الله اليوم ولا بكره افتح لها الموضوع
نايف مبتسم : صدق .. يا بعد عمري يا اختي
*********************
(( في بيت بو خالد – الصاله ))
مها : يمى .. اليوم بعد بروح بيت عمي زين
ام خالد : ما تشبعين من بيت عمك ؟؟ اقعدي اليوم اخوك سعود بيمر علينا
مها : وش اسوي فيه يعني لازم اقعد معاه كفايه ان انتي موجوده
خالد : حتى أنا بكون موجود
مها : شفتي هذا خالد بيقعد واكيد ابوي بعد بيقعد
بو خالد : لا لا أنا مشغول وبعد العصر بطلع
مها : يمى يكفي انتي وخالد
ام خالد : من متى ما شفتي سعود ؟؟ يا بنت استحي وقعدي مافي روحه لبيت عمك
مها مدت البوز ... رن جوال خالد وطلع برى يكلم .. مها شافت خالد برى على طول تذكرت نهى وراحت فوق لغرفة خالد..
افتحت باب الغرفه سكرته بشويش شغلت الكمبيوتر ... افتحت نافذة المسنجر سجلت ايميل خالد في ورقه فتحت صفحة الانترنت شافت المحفوظات ... سجلت اسماء المنتديات اللي يدخلها خالد واخذت اسمه المستعار.. سكرت كل شي وطفت الكمبيوتر وطلعت من الغرفه
مها : اوووووووف الحمد لله .. تمت العمليه بنجاح
انزلت تحت وقعدت تترجى في امها الا ترضى لها وتخليها تروح لبيت عمها .. امها وافقت بس قالت لها بعد ما يطلع سعود تروحين.. دخل خالد الصاله
مها : وش هالاتصال اللي يخليك تطلع برى وتكلم؟
خالد : هذا واحد من الشباب
مها : واحد من الشباب تطلع برى وتكلمه ليش ماكلمته هنا؟
خالد : مهيوووه انتي تعرفيني أنا مااحب هالخرابيط
مها في نفسها : ما تحب الخرابيط ؟؟ ايه هيييين علينا هالكلام
ام خالد : شوفي ان ماسكتي عن اخوك ما تروحين لبيت عمك
مها : خلاص يمى تووبه هااا بسكت ما ني متكلمه
اخذ خالد الجوال ودق على اخوه تركي
خالد: السلام عليكم
تركي : هلا والله وعليكم السلام
خالد : وينك يا اخوي لا نشوفك ولا تسأل ولا تدق
تركي : وش اسوي مشغول بدراستي وبخواتي
خالد : يا اخي ليش ما تجي خلود عندنا على الاقل كلنا مجتمعين
مها مو عاجبها كلام خالد وتقول بصوت محد يسمعه : يا ويلكم ان جبتوها هنا والله لذبحها
تركي : حاولت فيها وكم مره اقول لها بس ما في فايده
خالد : اذا ماتبي كيفها بس انت وساره لازم تجون تزورونا ولا نسيتوا ان عندكم اخوان واهل
تركي : وش دعوى يا اخوي كل يوم اذا راحت لأ مها أنا وسارة نجي البيت بس انت ما تنشاف
خالد : اليوم أنا قاعد في البيت ولا بعد سعود راح يمرنا تعال انت وساره اوكي
تركي :صدق ؟ سعود بيمر عليكم من زمان ما شفته النجس .. الا امي شخبارها؟
خالد : بخير الحمدلله .. يالله اجل اخليك الحين اذن العصر بقوم اصلي ... سلم على خلود وساره
تركي: ان شاء الله.. فمان الله
*****************************

كافيني اعصاب
مشاهدة الملف الشخصي
إرسال رسالة خاصة إلى كافيني اعصاب
ابحث عن المزيد من مشاركات كافيني اعصاب

قصة رومنسيه حب عند المصعد قمة في الرووووووووووووعه!!!!!!!

قصة رومنسيه حب عند المصعد قمة في الرووووووووووووعه!!!!!!!

رد: قصة رومنسيه حب عند المصعد قمة في الرووووووووووووعه!!!!!!!

رد: قصة رومنسيه حب عند المصعد قمة في الرووووووووووووعه!!!!!!!